Shrek, ina creatira verda ch'è per il solit da nauscha luna e che viva suletta en sia palì, giauda ses paus e sia solitariadad – fin ch'i furmicla in bel di tuttenina da figuras da paraulas en ses dachasa. Alvetta, Pinocchio, il retg-rauna, la nauscha regina – els tuts èn vegnids stgatschads sin cumond da l'engurd signur Lord Farquaad da lur patria, e tschertgan uss gist en la palì da Shrek refugi. Cumplettamain sgnervà na resta ad el nagut auter che da chattar ina schliaziun e da passentar differentas aventuras ensemen cun las figuras da paraulas – e vegn forsa a la fin cunter tuttas aspectativas a chattar novs amis.
«Ach du Shrek!» è in toc che cuntegna sper musica e scenas legras er in messadi pli profund davart las tematicas d'esser unic ed amicizia. L'istorgia sa basa sin il film animà «Shrek», enconuschent dapi sia publicaziun l'onn 2001. Per il toc da teater maina Lina Frei-Baselgia ensemen cun Silvana Candreia la reschia. Sa laschada inspirar per il toc, ha ella cunzunt tras il ritg fundus da costums da la gruppa da teater «Muntanellas»:
Jau hai vis quants bels costums che nus avain en il fundus ed hai pensà, landerora stuain nus far insatge!
Uschia èn ils numerus costums vegnids adattads als acturs giuvens. A quels resta dentant cunzunt ina sfida en memoria sch'els guardan enavos sin ils quatter mais da provas: Savair il text a memoria.
Cunzunt l'entschatta na pudev'ins anc betg ordadora il text ed ha stuì leger el adina ed adina puspè.
En il fratemp sajan els dentant per gronda part segirs dal text, uschia ch'ins stoppia filar mo anc qua e là per pudair impressiunar il public cun ina preschentaziun senza incaps ils 11 d'avrigl a chaschun da la premiera dal toc.
-
Bild 1 von 6. Rumplarot, la princessa Fiona e Pinocchio èn vegnids stgatschads da lur patria. Bildquelle: RTR.
-
Bild 2 von 6. Chatta forsa amis durant sias aventuras, e quai malgrà ch'el na leva quai insumma betg: La figura principala Shrek. Bildquelle: RTR.
-
Bild 3 von 6. In asen che discurra (per blers ina miracla, per Shrek plitost ina sgarschur, perquai che l’asen discurra tenor sia opiniun bler memia bler.). Bildquelle: RTR.
-
Bild 4 von 6. La princessa Fiona ha in secret, la notg sa transfurma ella numnadamain era en in Oger. Bildquelle: RTR.
-
Bild 5 von 6. Han ultra da lur stgatschada anc auters problems: Pinocchio fiss pli gugent in vair mat e Rumplarot avess gust d'engular uffants roials. Bildquelle: RTR.
-
Bild 6 von 6. Il signur Lord Farquaad (sanester) è responsabel per la stgatschada da las figuras da paraulas, perquai ch'il signur engurd vul construir in center da cumpras sin lur patria. Bildquelle: RTR.
Dapli dal tema: