En vista a l’elecziun ch’è la segunda mesadad da l’auter onn a l’urna, duessi dar diversas midadas. Uschia duessi dar adattaziuns tar la lescha da votaziun ed elecziun, sco era tar la lescha d’indemnisaziuns. Era il pensum da lavur dal president duess vegnir definì cleramain, quai che saja actualmain betg il cas. La paja sa basia sin in pensum da 80%. L’experientscha mussia dentant che cun las incumbensas actualas saja quel plitost 100%.
Model pli flexibel
Per auzar las schanzas per chattar ina candidata u in candidat per il presidi, è l'idea d'organisar l’uffizi pli flexibel. Uschia duessan tschertas incumbensas pudair vegnir repartidas sin la suprastanza. Cun quai duessi esser pussaivel, che la presidenta u il president fa anc in’autra lavur sper il presidi. Plinavant duessi dar in uschenumnà sistem da paracrudada en cas ch'il president en uffizi n'avess betg da vegnir reelegids. Alura duessan vegnir elavuradas pussaivladads, co che la persuna betg elegida pudess pudair surpigliar ina nova lavur entaifer la vischnanca.
En uffizi dapi la fusiun
Leo Thomann presidiescha la vischnanca da Surses dapi che quella ha fusiunà l’onn 2016. Surses exista or da las anteriuras vischnancas Bivio, Cunter, Marmorera, Mulegns, Salouf, Savognin, Riom-Parsonz, Sur e Tinizong-Rona. La vischnanca da Surses sa cumpona d’ina suprastanza communala executiva da quatter commembers e commembras, ed in president u ina presidenta communala. Las elecziuns han lieu mintga quatter onns a l’urna. La proxima elecziun dal presidi è en la segunda mesadad dal 2023.
