Pauca naiv - Enviern è funtauna d'aua

Il Grischun è ina stiva d'aua. L'aua da baiver curra senza fin. Quel maletg na vala dentant betg adina e betg per tut las regiuns. In enviern cun pauca naiv ha grondas consequenzas per l'aua da la proxima stad e sche la stad è stada ina setga sco quella da l'onn passà s'accentuescha la situaziun. Quai mussa in studi actual da l'institut da naiv e lavinas a Tavau. Emprimas vischnancas sco Andeer u er Surses per la fracziun da Cunter han infurmà la populaziun davart la situaziun. In emprim pass è da svidar ils bigls e da serrar quels.

Favrer adina pauc'aua

Martegn Netzer, il manader dal servetsch tecnic da la vischnanca da Surses po relativar la situaziun actuala. Il mument curra avunda aua en ils reservuars. Il temp da vacanzas il favrer sa cruscha cun il temp che las funtaunas portan la pli pauc'aua, Savognin haja alura tschintg enfin sis gia dapli abitants – ed er alura tanscha l'aua. Sco che la situaziun vegn dentant a sa mussar da stad na sappia dentant nagin dir. A media u lunga vista saja dentant l'avantatg da Surses che las funtaunas da Salouf portan adina fitg bler'aua e questa aua po vegnir nizzegiada er per autras fracziuns sco per exempel Cunter.

Aua sutterrana sco reservuar d'aua

L'aua sutterrana reagescha pli plaun sin fasas sitgas e cun paucas precipitaziuns. Quai sa mussa per exempel en la val dal Rain da Cuira. Yves Quirin da l'Uffizi per la natira e l'ambient ha observà ch'èn vegnidas fatgas ils ultims onns dapli dumondas da subvenziun per sauaziuns. Sche quai stettia en connex cun dapli setgiras na po el dentant betg dir – l'aua è cumpetenza da las vischnancas. Per Quirin è dentant er cler che la valur da l'aua duess vegnir stimada pli ferm.

Ed uschia accentuescha Quirin: «Sch'ina vischnanca metta giu l'aua per duas uras dat quai ina revoluziun». La glieud na saja betg sensibilisada avunda d'ina mancanza d'aua uschè ditg che l'aua curra senza fin ed è uschè favuraivla.

Diversifitgar

In tema en futur vegn segiramain ad esser che vischnancas cumenzan a far ponderaziuns davart lur situaziun da provediment d'aua. Sajan quai collavuraziuns, tschiffar novas funtaunas u diversifitgar funtaunas, aua sutterrana u aua da flums, è Quirin pervas. Per aua da baiver per exempel na vala nagina restricziun d'aua restanta. Aua da flum stuess dentant vegnir tractada.

Impressiuns reservuar