Parc Ela Trek - Organisaziuns d’ambient han mo paucas resalvas

Sco quai che Ruedi Bucher, il vicedirectur da la Pro Natura Grischun ha ditg envers RTR, temia el per exempel che l’anteriur alloschi dal militar al Pass dal Set saja schon il prievel, che l’alloschi pudess ina giada vegnir duvrà da glieud mo per far vacanzas, empè da vegnir duvrà da persunas dal Parc Ela Trek. U che l'alloschi daventia in di memia turistic. Era saja la dumonda sch’ils novs alloschis rendian, e tge che capitia cun quels sch’i n’avessan in di betg pli da render. Tut en tut saja il Parc Ela Trek in project innovativ che possia laschar giudair la glieud la bellezza cuntrada.

Glisch verda dal chantun

La regenza ha approvà il plan directiv Parc-Ela-Trek ch'è vegnì concludì da la regiun Alvra ils 28 d'avust 2020. La finamira da quest plan è da construir ina senda da viandar a lunga distanza sin il stgalim alpin sut il num «Parc-Ela-Trek». La ruta cumpiglia tut en tut 18 etappas. Ella percurra sin las sendas da viandar ch'existan gia, uschia che alloschis e manaschis d'alloschament existents èn integrads. I sa tracta d'in concept general ch'è vegnì sviluppà en stretga collavuraziun cun las corporaziuns d'alp e cun las vischnancas da domicil. La determinaziun en il plan directiv regiunal serva a garantir la coordinaziun territoriala ed a stgaffir las premissas dal dretg da planisaziun per realisar il project en la procedura per la permissiun da construcziun.