Dieter Müller vegnia a s’orientar da nov. El vegnia a surpigliar in nov post tar la firma da cussegliaziun Energie Zukunft Schweiz AG. Là saja el responsabel per schlargiar il champ commerzial da vischnancas ed instituziuns publicas.
Jau sun vegnì 50 ed jau hai avant dapli che dus onns decis, da tschertgar insatge nov cura che la prolungaziun dal contract dal parc è inoltrada.
L’uffizi federal d’ambient ha approvà il mez da fanadur la prolungaziun dal contract, suenter che tut las sis vischnancas dal Parc Ela han approvà la prolungaziun dal contract per ils onns 2022 – 2031.
En las lingias grassas è il Parc Ela vegnì questa primavaira. Pliras persunas han bandunà il Parc Ela u èn vegnidas relaschadas. Davart las raschuns da la gronda fluctuaziun da persunal n’ha il directur Dieter Müller, pervi da la protecziun da datas, betg prendì posiziun en detagl envers RTR.
Paolo Giacometti il president dal Parc Ela ha ditg ch’el deplorescha la desditga dal directur, ma quella saja d’acceptar. Davart ils virivaris ch’igl ha dà ainfer il Parc Ela n’ha el betg vulì prender posiziun: «Jau crai che quest tema è vegnì discutà avunda, ussa stuain nus guardar enavant».