Il Na a l'urna na munta dentant betg che l'EWZ perda la concessiun. La vischnanca da Surses aveva proponì da betg prolungar la concessiun dal dretg da las auas per las ovras idraulicas Tinizong e Nandro – per tegnair avert tut las opziuns tar tractativas davart la concessiun.
La concessiun actuala che las Ovras electricas da Turitg han da Surses per nizzegiar las auas en las ovras Tinizong e Nandro scada ils 31 da matg 2035. Tenor la lescha per ils dretgs d'aua ston las vischnancas decider davart prolungar ina concessiun enfin il pli tard 10 onns avant ch'ella scada. Cun la decisiun actuala ha Surses uss peda per tractativas e silsuenter decider ina da las variantas:
- sviluppar in'atgna schliaziun ensemen cun il chantun Grischun
- far ina nova concessiun cun las Ovras electricas da Turitg
- far ina nova concessiun cun in nov concessiunari
Per sclerir questa dumonda impurtanta e cumplexa hajan ins installà ina cumissiun, scriva la vischnanca. Quella cumissiun sa cumpona da represchentants da la vischnanca Surses ed Alvra, sco era da represchentants dal chantun Grischun ed experts externs.
Co vai vinavant per l'EWZ?
Per l'EWZ è la decisiun chapaivla, era sche Philippe Heinzer deplorescha quella. Per il manader energia tar las Ovras electricas Turitg saja in bun segn ch'ina prolungaziun cun els saja vinavant ina opziun per la vischnanca.
Nus deplorain questa decisiun, beneventain però ch'ina prolungaziun è ina da las trais opziuns che la vischnanca da Surses menziuna en ses messadi.
I vegnia uss preschentà ina nova offerta a la vischnanca ed al chantun. Quella nova proposta vegn pli probabel era ad avair ina participaziun vi dal gudogn, sco l'interpresa ha gia concretisà cun la vischnanca da Bregaglia. Nagina opziun per l'EWZ è l'uschenumnà «Heimfall», nua che la vischnanca ed il chantun surpiglian las ovras ed in'interpresa è be pli gestiunaria.
Per Andy Kollegger, president da la IG vischnancas da concessiun dal Grischun, è cler, ch'ins vegnia a guardar tge che capita en Surses, perquai ch'autras vischnancas stettian avant la medema decisiun. Concret vai per la dumonda, sch'ils daners generads en il Grischun restian era qua e sch'il provediment d'energia è era segirà per las proximas generaziuns.
En ils proxims onns scadan anc intginas autras concessiuns, qua chattais Vus la survista:
