Preparaziuns
Maun en maun èn gidanters e gidantras vi da construir l'open air e quai dapi sonda passada. La sonda han els construì la tribuna. La dumengia hai pluvì. Ma davent da glindesdi han els cumenzà cun tut il rest da las preparaziuns.
Ins ha montà tendas, ina chamona da lain, jurtas e quai entaifer curt temp. Tenor Stefan Gygax, responsabel per l'infrastructura, sajan els preparads bain, era sch'i plova.
L'aura metta dentant sfidas als organisaturs. Plievgia e vent engrevgieschan las preparaziuns. Per fortuna è l'aura fitg buna dapi il glindesdi, uschia saja tuttina tut gartegià senza incaps.
Bivio fa festa, era sch'i plova
«La plievgia tutga er tar l'open air», di in dals gidanters. Sin 1'900 meters sur mar possia esser fraid. Quai munta, trair en bun resti. A l'Open air Bivio èn quatter pignas vegnidas installadas en il liber. Quai per tegnair chaud las persunas.
Stgaudar pon ins era cun in café cun vinars.
En il mender cas stat er l'implant da protecziun civila a disposiziun. L'open air è numnadamain il pli aut da la Svizra. Durant il di sajan las temperaturas bunas sch'i na plovia betg. Cura ch'il sulegl è davent, vegnia però frestg a Bivio.
L'open air festivescha ses quart anniversari. Quest onn cun dubel uschè blera glieud sco l'onn passà.