La MUMA duess mussar, tge ch'i dettia tut en las trais valladas, e che la collavuraziun funcziuneschia. Sper la collavuraziun sur las trais vals dettia quest onn schizunt ina collavuraziun surchantunala cun la Scola auta turitgaisa da scienzas applitgadas ZHAW. Lezza ha in post a Vargistagn sco partenaria da la MUMA.
Ch'igl haja dà ina pausa sfurzada da sis enstagl da trais onns da l’occurrenza na saja betg uschè nausch, di il president dal comité d'organisaziun Gion Michael.
Uschia è forsa il plaschair da puspè avair ina MUMA e vulair sa participar gist anc pli grond.
Las annunzias dals mastergnants sajan rivadas fitg spert. Passa 50 expositurs da la regiun sa preschentan quest onn a la MUMA. Mintga ediziun datti in'exposiziun da biestga, il venderdi saira suna la chapella Oberalp e la festa da la sonda saira saja gia prest legendara. Las uniuns da la regiun organiseschan l’ustaria da l'exposiziun. Quai sajan passa 300 persunas che gidian, di Gion Michael.
La MUMA è ina festa da s'entupar per l'entira regiun.
Simplamain ina buna occasiun da s'entupar e discurrer in cun l'auter. Gist il temp spert e digital dad ozendi saja quai tant pli impurtant per la glieud da pudair s'entupar en persuna. Quai vegnia er stimà puspe pli e pli fitg da la glieud. A la MUMA giaja betg en emprima lingia per far fatschenta, mabain per s'entupar.
RTR a la MUMA ad Andeer
RTR visita la MUMA ad Andeer cun la Microlotta e radio live durant trais dis. Nus avain pront in quiz da chanzuns, program per ils pitschens e faschain radio live dal lieu.
Sper diversas fatschentas e manaschis agriculs è era RTR preschent cun la Microlotta ed in stan cun purschidas interessantas per il public. Essas era Vus da la partida quels trais dis? Lura faschai ina visita al stan da RTR e scuvri noss program multifar. Tar nus avais Vus la pussaivladad da testar Vossa savida en il sectur musical cun in quiz da chanzuns, durant ch'ils pitschens e las pitschnas pon colurar in agen set da tic-tac-toe. Sper quai pudais Vus tranter auter As participar ad ina concurrenza cun la schanza da gudagnar in bel premi.
- venderdi, 02-05-2025, 14:00 – 20:00
- sonda, 03-05-2025, 10:00 – 20:00
- dumengia, 04-05-2025, 10:00 – 17:00
Sonda e dumengia dat RTR la pussaivladad da dar in sguard davos las culissas da noss studio da radio mobil, nua che Vus pudais As participar a gieus, gratular a Voss chars e Vossas charas ed anc bler auter.
Nus ans legrain sin numerusas visitas durant quels trais dis.