- Il 25 da settember ha il suveran refusà in credit supplementar dad 1,5 milliuns francs per il center da sport «La Nars» a Savognin.
- Per il bajetg principal dal center da sport vala perquai t in stop da planisaziun
Mario Dosch da Tinizong crititgescha l’agir da la vischnanca. Quella n'avess betg pudì cumenzar a bajegiar l'arena da sport. Perquai che la vischnanca haja gia tar l'emprima badigliada savì, ch'ils 4,5 milliuns francs na tanschian betg per realisar l'entir project. Ussa stoppia la fatschenta puspè ir en votaziun cun in project redimensiunà. Leo Thomann, il president communal da Surses ha ditg envers RTR ch'els sajan il mument vi d'in project redimensiunà. Sch'ins restia en il rom da 4,5 milliuns francs approvads dal suveran, alura na stoppia il nov project eventualmain betg pli ir en votaziun.
Critica er envers la cumissiun da gestiun
La cumissiun da gestiun saja il mument en stretg contact cun la suprastanza communala. In conflict d'interess sco pretendì da Mario Dosch, na vesa il president da la cumissiun da gestiun (GPK) Urs Guetg betg. Quai conferma era l'Uffizi da vischnancas dal Grischun. Thomas Kollegger, il schef da l'uffizi scriva ad RTR, ch'el haja legì ils protocols da la vischnanca da Surses, ina irregularitad u conflicts d'interess n'haja el betg constatà.I vegn anc construì a fin quai ch'è cumenzà a Savognin. Quai èn ils magazins e plazs da garascha sut la plazza da sport multifuncziunala ch'è la stad ina plazza da tennis e l'enviern ina plazza da glatsch.
Per il bajetg principal dal center da sport – che cumpiglia in'ustaria, gardarobas ed indrizs sanitars – vala per il mument in stop da planisaziun. Ina cumissiun s'occupia uss cun la dumonda co vinavant, ha confermà il president communal da Surses Leo Thomann envers RTR. Decisiva saja la dumonda dals custs: Nua stat ins actualmain e tge è pussaivel da spargnar?
