Ils commembers da l'uniun «Parc natiral Beverin» han approvà la charta per ils onns 2023 fin 2032. Quai è vegnì decis a la radunanza dals commembers il venderdi passà. Gia l'atun passà han las nov vischnancas dal Parc natiral votà per prolungar il contract cun il Parc natiral Beverin. A chaschun da la radunanza han las vischnancas suttascrit quel. Quai communitgescha il Parc natiral Beverin.
L'uniun ha era decis, d'inoltrar la dumonda per prolungar il label da la Confederaziun «Parc natiral regiunal d'impurtanza naziunala» per ils proxims 10 onns. Questa dumonda va uss vinavant tar l'Uffizi per la natira e l'ambient dal Grischun e la resposta vegn spitgada fin mez onn.