Sco quai che Thomas Breitenmoser, il manader dal project da las perfuraziuns da la firma Büro für Technische Geologie da Sargans ha ditg, sajan questas scuvertas fitg impurtantas per analisar mesiras per stabilisar il «Rutsch» da Brinzauls. Tenor infurmaziuns dal chantun pon emprimas mesiras dentant pir vegnir realisadas a partir da l’onn 2025. Per quest onn vegn anc examinà sch’igl è pussaivel da far ulteriuras mesiraziuns. Funtaunas d’aua pli grondas sco ch’i vegn supponì, n' hajan ins enfin oz anc betg constatà, stat scrit en il davos bulletin da la vischnanca Albula/Alvra.
Plinavant scriva la vischnanca che la muntogna sur Brinzauls glischnia actualmain cun ina spertezza dad 1,2 meters per onn. Quest mardi duai il plan d’evacuaziun vegnir surlavurà, sco gia annunzià il november.
RTR actualitad 18:00
