Dapi var sis onns – cun ina curta interrupziun enturn il 2020 – è l'hotel cun fin a 250 letgs (actualmain 90 letgs) dasper la staziun a val da las pendicularas da Savognin serrà. Iniziant e possessur è l'investur austriac Rudolf Tucek. Adina puspè ha el chaschunà lingias grassas en connex cun l'hotel pervi da daivets, dispitas e differentas opiniuns tranter el e la vischnanca da Surses ubain las pendicularas.
Dapi onns naginas radunanzas generalas pli
Punct decisiv per la dretgira d'intervegnir actualmain è che la gestiunaria da l'hotel – la firma da Rudolf Tucek – n'è giuridicamain betg abla d'agir perquai ch'i n'ha dapi onns betg pli dà ina radunanza generala sco la lescha ed ils statuts da la fatschenta prescrivan. Era Tucek sez sco cusseglier d'administraziun avess da vegnir (re-)elegì mintg'onn da la radunanza generala. Plinavant hai era dà difficultads da communitgar cun la gestiunaria perquai che la posta n'arrivava betg e returnava u vegniva manada enturn fin en l'Austria. Ina situaziun che n'è tenor la dretgira betg acceptabla. I stoppia esser pussaivel da trametter posta dad ina firma e ch'igl haja là era persunas che possian prender encunter quella, p. ex. brevs enscrittas.
Suenter avair evaluà l'entira situaziun, ha la dretgira regiunala Alvra decis – malgrà las difficultads da fin qua – d'engaschar Rudolf Tucek sco curatur che ha d'ademplir diversas pretensiuns fin ils 11 da november. Tranter auter:
- organisar ina radunanza generala extraordinaria uschia ch'ils acziunaris pon puspè prender decisiuns en connex cun l'hotel
- cumprovar ch'igl è pussaivel da trametter posta e retschaiver quella a la sedia da la societad d'aczias u ch'insatgi (p. ex. in'advocatura) fetschia quai en l'avegnir per la societad
- annunziar la persuna elegida da la radunanza generala extraordinaira sco administratur al register da commerzi
- annunziar al register da commerzi la persuna elegida da la radunanza generala extraordinaria sco post da revisiun
I smanatscha la liquidaziun
Na vegnan questas pretensiuns betg ademplidas cumplainamain fin ils 11 da november, pudess la societad d'aczias vegnir liquidada senza ulteriuras mesiras u tractativas. Uschia pudessi esser che l'hotel vegniss ingiantà e cun il retgav vegnissan pajads ils daivets. Actualmain na datti sco i para anc nagin invit per ina radunanza generala extraordinaira. Sin la pagina d'internet dal Figl uffizial svizzer n'è publitgà nagut ed era las pendicularas Savognin ch'èn acziunarias n'han fin uss survegnì nagin invit, sco ellas han confermà sin dumonda da RTR. Sper ademplir las pretensiuns da la dretgira regiunala, resta a Rudolf Tucek er anc la pussaivladad da trair vinavnat il cas sco acziunari a la dretgira chantunala.
Or da l'archiv
Il 2005 è l'hotel Cube vegnì construì cun in nov concept cunzunt per la clientella giuvna. Il 2018 èn las portas lura sa serradas per l'emprima giada pervi da daivets ed ina dispita giuridica cun las pendicularas.
Il 2020 lura la reavertura sco hotel da garni. Ed il 2022 lura la communicaziun ch'ins na possia betg cuntinuar cun il manaschi pervi da la pandemia da corona – fin tar il cas da dretgira il 2024.