Grischun Central - Scola Seglias survegn in abitadi per avieuls selvadis
La scola primara da Seglias ha gudagnà l’emprim premi d’ina concurrenza da la fatschenta «Wildbiene und Partner». In video producì da la scola ha survegnì las pli bleras vuschs en la concurrenza. Gist davant scola da Seglias en Tumleastga vegn fabritgà in abitadi biodiversitar per avieuls selvadis.
Il mars cumenza la planisaziun da l’abitadi d’avieuls selvadis. L’idea è da realisar in abitadi d’avieuls cun ina surfatscha da radund 600 meters quadrat. Ina part dal spazi duai vegnir cuverta cun glera e sablun per dar in abitadi ad avieuls che fan il gnieu sin il terratsch. Plinavant duai dar dapli che tschient plantas, plantinas e flurs indigenas. L’avertura è planisada la stad dal 2020.
