Patricia Scarpatetti viva cun 36 uffants a San Pèdro Sula en las Honduras, ina da las pli privlusas citads dal mund. Co quai è da viver là mintga di e manar ina chasa d'uffants – quai è en il center dal film da Paula Nay ch'ha gì premiera venderdi saira en a Salouf. In film ch'ha emplenì la sala cun radund 200 persunas.
La preschentaziun dal film en la patria da la protagonista Patricia Scarpatetti è stada in gieu da chasa. La halla a Salouf bain plaina ha mussà che la glieud respecta e sustegna la lavur caritativa da Scarpatetti a Honduras. «Mamma per 36 uffants», ina lavur da 7 dis ad emna, 24 uras a di.
Suenter in voluntariat en ina chasa d’uffants a Honduras, è Patricia Scarpatetti turnada a Honduras ed ha fundà in’atgna chasa d’uffants: «Yo quiero ser», nua ch'ella tgira uffants cun biografias per part tragicas. Per «ses» uffants fa ella da tgirunza, psicologa, organisatura, administratura e cumbatta per ils dretgs dals uffants avant dretgira.
Jau sun bain la «mamma per 36 uffants», però mintgin che sustegna è padrin u madritscha, tat u tatta dals uffants.
A la premiera ha Patricia Scarpatetti engrazià a tuttas e tuts per il sustegn ch'ella survegn. Pertge mo cun quest sustegn possia ella far sia lavur.
Il film vegn mussà questa dumengia, a las 17:25, sin SRF 1.
RR actualitad 06:00