Ins veglia però persequitar vinavant il project che saja da gronda impurtanza per la regiun da vacanzas. Il projet da 100 milliuns francs avess previs in ressort da vacanzas cun 96 abitaziuns, in hotel cun 200 letgs ed in bogn da divertiment public.
Crap da stgarpitsch è stada la planisaziun en detagl tranter l'investider principal da l'Austria Manfred Moschner, il sviluppader dal project ed il manader. I na saja betg reussì da sa cunvegnir davart questa planisaziun entaifer temp util, uschia ch'ils investider sajan sa decidids da s'orientar autramain, scriva la vischnanca da Savognin.
La vischnanca ha er terminà ils discurs cun il manader pussaivel dal project, Rudolf Tucek. Motiv è tenor la vischnanca che las tractativas sajan idas en ina direcziun betg acceptabla per la vischnanca.
Projects pli pitschens a curta vista
D'ina vart vul la vischnanca persequitar vinavant ed adattar il project grond ensemen cun il sviluppader. Prioritad haja la tschertga d'in nov manader e d'investiders. Previs è er ina optimaziun da construcziun e da concept dal project per cuntanscher ina reducziun dals custs. Fin cura che quai vegn fatg n'è betg anc cler.
Da l'autra vart vul la vischnanca persequitar en il fratemp la realisaziun da projects pli pitschens. Per exempel in hotel da quatter stailas cun radund 70 letgs en il conturn da Sandeilas, in parc da velos en il territori da skis da Somtgant a Tigignas u er l'engrondiment dal center da passlung a Rona.
RR novitads 11:00