Ils daivets muntan a 6,5 milliuns francs. Las pendicularas da Spleia-Tambo SA dovran dentant immediatamain nov chapital per insumma pudair pajar las pajas dal persunal. Uschia smanatscha anc adina il concurs e senza novs investiders privats na possian las pendicularas betg surviver.
Enfin la fin da zercladur decidan ultra da quai 12 vischnancas da la regiun Viamala davart in sustegn finanzial per las pendicularas da total 800'000 francs. Sco quai che Franco Quinter, il president dal cussegl d'administraziun da las pendicularas Spleia Tambo ha ditg, è el da buna speranza da pudair surmuntar la crisa cun agid da las bancas e da las vischnancas.
Pretsch d'indigens per tuts
Plinavant cumenzas las pendicularas cun la prevendita da las cartas da la stagiun d'enviern. Tgi che cumpra la carta enfin la fin d'avust, paja sco creschì 390 francs, l'enviern passà era quai anc 655 francs. Quai munta che tut las persunas pajan da nov la tariffa d'indigens.
In novum è era che tut ils uffants enfin 12 onns van gratuitamain sin pista - e quai vala era per gruppas. Cun questas mesiras vulan las pendicularas carmalar dapli glieud sin pista.
Nov manader da fatschenta
Il cussegl d'administraziun ha preschentà a Spleia il nov manader da fatschenta da las pendicularas Spleia-Tambo SA. Ersel Sertkan remplazza a partir dad immediat Andrea Camastral.
Sertkan ha tranter auter lavurà tar las pendicularas da Corvatsch sco manader dal marketing e sco manader da fatschenta d'ina inerpresa privata da San Murezzan.
RR novitads 20:00++