Sco quai che las pendicularas scrivan, haja la stad mo ina pitschna muntada en congual cun la stagiun d’enviern. Dus fitg buns dis da l’enviern tanschian per far las medemas entradas sco l’entira stad.
Pauca naiv - paucs sportists
La stagiun d’enviern n’è betg stada buna. Nagina naiv natirala enfin il mez da schaner e suenter bler’aura cun pauc sulegl las fins d’emna hajan laschà star a chasa ils sportists d’enviern. Il retgav da gestiun è sa reducì per 4.8% sin 26.8 milliuns francs.
Ulteriur potenzial la stad
En tut han radund 700’000 giasts visità il territori da skis da Lai, quai èn 3.3% pli pauc che l’onn avant. In record saja stà la stad: La svieuta da traffic saja s’augmentada per tschintg pertschient sin 1.5 milliuns francs. Malgrà questas bunas cifras vesan las pendicularas anc dapli potenzial da svilup la stagiun da stad.