Las Pendicularas da Spleia Tambo SA han fatg il davos onn da fatschenta 2017/18 ina svieuta da 3.2 milliuns francs. Suenter expensas ed amortisaziuns datti in resultat da gestiun cun in minus dad 1.8 milliuns francs. Pervi da entradas da 6 milliuns francs ord in program da sanaziun, mussa il quint tuttina in gudogn da 3.5 milliuns. Tenor il rapport annual han las pendicularas il mument anc chapital ester en la summa da circa 3.2 milliuns francs.
Hans-Christian Bernet nov en il cussegl d'administraziun
La radunanza generala da las Pendicularas da Spleia Tambo SA ha approvà il quint 2017/18. Plinavant ha ella elegì Hans-Christian Bernet en il cussegl d’administraziun. L’anteriur manader da fatschenta da las Pendicularas da Claustra-Madrisa SA remplazza Hans-Andrea Fontana, ch’è president communal d’Andeer ed è stà en il cussegl d’administraziun sco represchentant da la vischnanca.
Betg cuntanschì finamiras giavischadas
En il rapport annual da las Pendicularas da Spleia Tambo SA scriva il president dal cussegl d’administraziun Franco Quinter che blera naiv na veglia betg automaticamain dir, che la stagiun daventia in success. Pervi da l’aura che na saja savens betg stada uschè buna, hajan ins betg cuntanschì las frequenzas giavischadas. Era sch’igl haja gì 27% dapli giasts sin pista, na saja quai betg anc quai ch’ins giavischia.
Per che la fatschenta sa possia sviluppar enavant, sajan ussa urgentamain necessarias novas pussaivladads da pernottar. Actualmain sajan ils responsabels a la tschertga da crediturs, che veglian investir en la regiun. Els sajan en discurs cun diversas persunas e circuls, ed ils resuns sajan detg positivs, ha ditg Quinter a la radunanza generala da venderdi suentermezdi.
RR actualitad 08:00