Grischun Central - «Muntogna da Schons» vul metter gronda paisa sin rumantsch
La lingua uffiziala da la vischnanca fusiunada duai esser rumantsch e tudestg. Lingua da scola è rumantsch. Plinavant duai vegnir scrit en il contract da fusiun che la vischnanca fusiunada «Muntogna da Schons» è da lingua rumantscha. Ella s’oblighescha da cultivar e promover il rumantsch.
Mardi saira ha la gruppa da project che prepara la fusiun elavurà a Donat ina proposta da lingua per il contract da fusiun. Cun quai che la lingua uffiziala duai vegnir definida cun rumantsch e tudestg, duai per exempel la pagina d’internet da la vischnanca e documents impurtants vegnir publitgads biling. Betg anc decidì è en tge lingua che la radunanza communala duess vegnir manada. La primavaira proxima decidan las vischnancas da Casti-Vargistagn, Donat, Lon e Maton davart la fusiun.
Legenda:
Las vischnancas pli «ritgas» na fan betg part a la fusiun.
Grafica RTR
