Sco quai che Harry Graf, il pledader da l’Ovra electrica da Turitg ha ditg sin dumonda, sajan ils daners dal KEV decisivs per la rentabilitad da la nov’ovra idraulica pitschna che duai turbinar l’aua dal Adont en il conturn dal lai da Burvagn. Sin la glista da spetga saja l'EWZ gia pli ditg. Quai possia dentant anc ir mais u plirs onns, enfin ch’i dattia ina resposta definitiva. Pertutgant la rentabilitad dependia quai era, quant aut ch’ils tschains d’aua sajan cura ch’il project vegnia realisà.
L’exposiziun publica dal project Adont cuzza anc enfin ils 5 da fanadur. Enfin oz n’haja quai dà nagins recurs, ha confermà l’Uffizi d’energia e da traffic. Las organisaziuns d’ambient ch’èn stadas involvidas en ils discurs, na fan nagin recurs. Tenor la manadra dal WWF Grischun Anita Mazzetta saja ins sa cunvegnids cun in cumpromiss che cuntentia tuts. Ma in’ovra idraulica saja adina in’intervenziun en la natira, ch’ins evitass il pli gugent, di Anita Mazzetta.