Ch’il hotel ha serrà dad in di sin l’auter è stà ina gronda surpraisa per blers . Uschia era per Grischun Vacanzas. Tenor il directur Martin Vincenz n’haja el avant la serrada betg udì ch’il hotel da 13 onns fiss en privel da stuair serrar.
I saja dentant schon uschia che da manar in hotel en il Grischun saja magari pli difficil ch’en auters lieus da l’exteriur, tranter auter pervi dal ferm franc svizzer. Sche la serrada dal Cube ha dentant raschuns finanzialas n’è per il mument anc betg cler.
Nagin agid da Grischun Vacanzas
Grischun Vacanzas na po dentant betg far insatge per l'Hotel Cube:
Nus pudain be communitgar quai che nus avain en noss portfolio, quai ch’i dat – sco las destinaziuns, la viafier retica, las ustarias ed uschia enavant. Na datti ina purschida ina giada betg pli alura na pudain nus betg pli communitgar quai ed era per l’infrastructura na pudain nus far nagut.
Ins na possia betg diriger las fatschentas dals hotels. I saja er bun ch’ins na possia betg sa maschadar en lur affars, uschia Vincenz.
Ils letgs d'hotel en la regiun turistica Savognin Bivio Alvra en ina survista:
- Cube: 270
- Savognin: 490 (Cube ha 55% da tut ils letgs d'hotel)
- Entira regiun turistica Savognin Bivio Alvra: 1150 (Cube ha 23.5% da tut ils letgs d'hotel)
Quai vul dir che Savognin n'è betg pli il lieu cun ils pli blers letgs en la regiun turistica Savognin Bivio Alvra:
- Bivio 269
- Savognin nov 220 (= 490-270 da Cube)
- Casti 120
- Tagn/Wiesen 88
RR actualitad 17:10
