Las mesiras valan almain enfin ils 15 da mars. Cun betg laschar ora en il liber las giaglinas, n’èn quellas betg en privel da vegnir en contact cun auters utschels che pudessan infectar las giaglinas cun la malsogna mortala. Sco quai ch'il veterinari chantunal Giochen Bearth ha ditg, saja impurtant che las giaglinas na possian il mument betg ir ora en il liber: «In motiv è la situaziun en l’exteriur nua ch'i dat blers cas da grippa d’utschels. Ed in segund punct è che nus essan pir en il mais dal favrer, in temp nua ch'ils utschels viagian dal nord tar nus ed èn uschia en il quartier d'enviern qua en Svizra.» En Svizra dettia actualmain be singuls cas da grippa d'utschels las ultimas emnas. En l'Europa saja la situaziun però alarmanta.
Pur po viver cun restricziuns
In ch’è pertutgà da quellas mesiras è il pur da Cunter Mirco Uffer. Sco quai ch’el ha ditg envers RTR, sajan las mesiras supportablas, perquai che las giaglinas na giajan uschè u uschia betg gugent ora en il liber l’enviern. E cun la voliera hajan las giaglinas tuttina ina tscherta libertad. Avessan las mesiras da vegnir prolungadas da nov il mez da mars, alura vesess el quai bain sco problem, ha ditg Uffer. La stad saja fitg impurtant che las giaglinas possian ir ora en il liber.
Sche ovs n’èn gnanc «ovs da giaglinas che vivan en il liber»
Pervi da las mesiras n’accumpleschan ils ovs cun l’etichetta da giaglinas che vivan en il liber betg las reglas. Tuttina vegnan ils ovs vendids sco ovs da giaglinas «Freilandeier». L’ordinaziun correspundenta permetta quai. Ed il pur Mirco Uffer di: «Il pavel custa tuttina ed era las mesiras che nus stuain prender chaschunan custs. Il pretsch è perquai giustifitgà.»
Era l’Uniun svizra da consuments vesa quai sumegliant. Sin dumonda dad RTR scriva la mainafatschenta Sara Stalder: «Il reglament dal Cussegl federal permetta ch’ils ovs mantegnan ad interim lur etichetta. Stuessan ils ovs vegnir declerads auter, stuess er il svilup dal pretsch vegnir persequità.» Ils possessurs e las possessuras da giaglinas speran uss che las mesiras vegnan abolidas mez mars, uschia che las giaglinas pudessan lura era puspè ir dadora – ch’ellas fissan lura puspè 100% «giaglinas che vivan en il liber».
