La Confederaziun ha ordinà mesiras per l'entira Svizra cunter la grippa d'utschels. Quai ha communitgà l'Uffizi federal da segirezza alimentara e fatgs veterinars. La raschun è che questa epidemia è cumparida en ina tratga privata en il chantun Turitg.
Il coc da las mesiras è dad impedir il contact d'utschels selvadis cun pulom da chasa per impedir ina derasaziun dal virus. Tranter auter pon ils puloms da chasa mo pli esser en lieus nua ch'ils utschels selvadis na pon betg ir en. Giaglinas na dastgan betg esser ensemen cun aucas ed andas e martgàs da puloms èn scumandads. Las mesiras valan da glindesdi fin ils 15 da favrer 2023.
