A la vischnanca da Ferrera/Schmitten stat l'aua fin il culiez. Per pudair far las investiziuns necessarias mantgan mintg'onn 250'000 francs. Il president communal Marc Fürsinger ha a chaschun da la saira d'infurmaziun explitgà che las reservas da l'agen chapital èn duvradas il pli tard en dus onns. «La vischnanca dat or dapi intgins onns dapli raps che quai ch'i vegn en.» Uschia saja il spazi d'agir finanzial per la vischnanca fitg limità.
La mancanza da finanzas fa a nus fitg gronds quitads.
Dapli taglia e fusiun
Per esser ina spusa attractiva en ina fusiun communala cun las vischnancas da Tavau, Albula/Alvra ni Bravuogn/Filisur duess Schmitten per exempel generar dapli entradas cun auzar il pe da taglia. Cun in questiunari vegn la populaziun ussa dumandada consultativ, cun tge vischnanca ch'ins preferiss da fusiunar. Emprims contacts èn fatgs cun tut ils trais vischins.
Tavau en avantatg
Dapi in onn fa Schmitten part al consorzi da scola Tavau. La dretgira administrativa aveva decidì l'avrigl 2022 cunter la regenza grischuna, che vuleva che Schmitten resta cun la scola en la val Alvra. La suveranitad communala è vegnida valutada pi auta e quai pudess esser il avraporta per ina fusiun cun Tavau.
Ina fusiun da Schmitten e Tavau po esser ina soluziun. Il chantun vegn a porscher maun.
Ma er cun las duas autras vischnancas vulessan ins restar en contact per avair tut las opziuns, hai gì num a la saira d’informaziun. Ch'il chantun pudess porscher maun per ina fusiun cun Tavau, ha era confermà il vicemanader da l'Uffizi da vischnancas chantunal Simon Theus. «Nus vegnin en mintga cass a porscher maun ed accumpagnar ina tala fusiun». La scola saja in ferm argument per ir a Tavau. Il medem mument saja dentant er da mantegnair in bun contact cun las autras vischnancas, ha Theus punctuà pliras giadas.