Las pendicularas Spleia-Tambo han ils ultims onns cumbattì cun differentas sfidas: crisa finanziala, mancanza da naiv ed er midadas da persunal a la testa. Avant dus onns lura, ha Peter Engler surpiglià ad interim l'interpresa, cun l'idea da chattar ina successiun suenter in onn. Ord in onn hai la finala dà dus – uss han las pendicularas però chattà cun Fabian Koch in nov mainagestiun.
Ord la branscha da marketing cun passiun per sport da muntogna
Fabian Koch è oriund da la Svizra Centrala ed è vegnì pervia da l'amur avant intgins onns en il Grischun. El deriva dal a branscha da marketing ed ha lavurà ils ultims 15 onns en differentas interpresas en la sparta da marketing, sponsoring ed events. Sper quai haja el ina gronda passiun per las muntognas, il sport en la natira e saja fitg motivà da cumenzar en la branscha da pendicularas, uschia ha declerà l'um da 36 onns envers RTR.
Per mai èsi impurtant ch'er pitschens territoris e lieus turisitics vegnan mantegnids.
Mantegnair ma er patratgar da nov
Fabian Koch vul che Spleia-Tambo resta e daventa anc pli fitg in territori da skis cun bunas cundiziuns da naiv, ina buna purschida da pistas ed ideal per famiglias. En tscherts lieus veglia el dentant er far midadas e patratgar auter ch'enfin uss. Anc uss possia el dentant betg dir nua e tge che quai duai esser. Sfidas dettia en mintga cas avunda. Uschia per exempel da sa posiziunar pli cler sin il martgà ed er da vegnir a frida cun las cundiziuns da naiv. El sa legria fitg sin la sfida e cumenzia sia nova lavur cun optimissem e motivaziun.