Il problem saja fatg en chasa resumescha Enrico Uffer, impressari da Savognin, cura ch'el discurra da la laina grischuna che vegn exportada per exempel en Italia per cumprar alura laina elavurada dal'exteriur per construir ina mobiglia u ina chasa. Per Uffer, che realisescha il mument ina resgia gronda en Surses na cuntenta la situaziun il mument betg. El è persvadì che l'elavuraziun sto succeder en Grischun, uschia ch'il gudogn resta er en il chantun.
Barbara Schuler-Rozzi la presidenta da la secziun grischuna dals scrinaris e producents da mobiglia vesa er ina gronda sfida en la communicaziun tranter patruns da construcziun, architects ed ils manuals. Il mument saja la gronda sfida da declerar la situaziun – sia experientscha saja dentant che la chapientscha saja gronda tar tuts. La pandemia e la guerra en l'Ucraina hajan vinavant mussà quant gronda che la dependenza saja per tuts, er per la branscha da lain dal Grischun e quai cun in material che creschia avant porta.
