L'entschatta da quest onn è il museum «Tgea da Schons» ch'era in dals pensums principals da la cuminànza culturala Val Schons vegnì transferì a la nova fundaziun Tgea da Schons. La cuminanza culturala exista dentant vinavant.
Pli vesaivel e cun nov schlantsch
L'uniun saja adina stada fitg activa, di il president Andrea Cantieni. Uschia ha ella per exempel edì il «Cudesch da Schons», dà contribuziuns a projects culturals da la Val Schons ed organisà il gieu en il liber il 2013 – quai a chaschun da 555 onns Val Schons libra cun il titel «Ramurs». Forsa na saja la cuminanza betg stada uschè vesaivla. Il favrer da l'onn passà hajan ins schizunt discutà da schliar l'uniun. Mo cun il nov president Andrea Cantieni haja la cuminanza culturala Val Schons survegnì nov schlantsch.
Avant dus onns e mez ha el surpiglià la chasa da tat e tata a Pignia ed è turnà tar sias ragischs. Er sch'el na discurrì (anc) betg rumantsch, chapescha el Sutsilvan. Er la correspundenza a scrit fetschia el adina per rumantsch. Dapi circa in onn è el president da la cuminanza. A partir da la stad passada ha l'uniun organisà differentas occurrenzas per e cun la glieud da la Val Schons, per exempel ina saira da regurdientscha a Jakob Poltera, ch'è stà l'ultim tschavrer da Pignia.
Las occurrenzas da cuminanza èn appreziadas
Er ina saira da kino nocturn per rumantsch ed il project «cantar cun Incantanti» ha l'uniun organisà. In chor da project da passa 80 persunas da la Val Schons, la Tumleastga, la Mantogna e la Val Ragn han chantà – ensemen cun il chor da giuvenils Incantanti – chanzuns da cumponists da la Val Schons.
Las occurrenzas da la cuminanza sajan bain frequentadas, uschia che la decisiun da mantegnair l'uniun saja stada la dretga, di Andrea Cantieni. Ils resuns ch'el survegnia sajan positivs, la glieud haja plaschair ch'i vegnia organisà insatge per e cun quels da Schons.
Il plaschair è mia motivaziun da m'engaschar per la cuminanza culturala Val Schons: il plaschair vi da la val, la glieud qua ed il plaschair vi da la cultura.
Inqual project futur da la cuminanza è gia pront per la partenza: En il rom da l'exposiziun mobila da 500 onns Grischun – che fa in stop en la Val Schons – organiseschia la cuminanza il program da rama cun referats ed arranschaments culturals. Per il 2026 saja planisà in grond gieu liber en la Val Schons.
