L’atun 2024 duessan cumenzar las lavurs da construcziun. L’onn proxim sto il suveran da Surses deliberar il credit da construcziun. La vischnanca quinta cun custs d'almain 12 milliuns francs. Durant las lavurs da construcziun vegn la scolina dischlocada en la Villa Aurora a Savognin, las emprimas quatter classas primaras ston ir a Salouf. La tschintgavla e sisavla classa è schon ussa en la scola cirquitala Barnagn.
Concurrenza cun 30 annunzias
En tut èn s'annunziads 30 biros d'architectura per construir la nova scola. En pliras rundas d'examinaziun ha ina giuria tschertgà il meglier project. A la fin ha persvas la cuminanza da lavur dals biros d'architectura Ruch e partenari da San Murezzen ed il biro d'architectura RBA d'Olten. Ils ins avevan gia realisà la scola da San Murezzan, ils auters la chasa da scola da Tavau.
Il project consista da dus bajetgs, in per la scola ed in per la scolina. Per construir vulan ins duvrar principalmain laina indigena, be il mir da basa duai esser da betun.