Sco quai che Daniel Albertin, il president communal dad Alvra ha ditg, vegnia la vischnanca proximamain a decider en chaussa. Quai muntia ch’i possia puspè vegnir bajegià en las zonas che vegnian relaschadas or da la zona da planisaziun. Actualmain dettia diversas dumondas da bajegiar che hajan stuì vegnir sistidas pervi da la zona da planisaziun.
Nova charta da privels per cas da crudada
Sco quai ch’i stat scrit en il bulletin actual en connex cun la bova da Brinzauls, sajan ils prievels entras il «Rutsch» per ils vitgs e las vias ussa circa medem gronds sco avant in onn. Suenter la crudada da l’insla ils 15 da zercladur 2023 han geologs ed experts da privels da la natira evaluà da nov eventualas crudadas che pon partir da la bova. Per quest intent han els creà ina nova carta da privel. Grondas sbuvadas da la grippa vegnan a chaschunar il pli svelt currents da bova, sco che quai era gia il cas tar l’insla.
Il vest è il pli periclità
Flums da bovas (Schuttstrom) giun plaun sco il Rutsch sajan plitost pauc probabels. Flums da bovas che cuntanschan spertadads fitg autas e chaschunan grondas devastaziuns, na possian ins bain betg excluder dal tuttafatg, ma ellas sajanpauc probablas. Quai stat scrit en il bulletin da la vischnanca Alvra. Sch'ins guardia pli precis ils singuls scenaris, saja la probabilitad la pli gronda ch'i vegn a dar ina sbuvadas en il sectur «vest svelt» entaifer ils proxims tschintg onns. Per ils dus scenaris cun ils effects ils pli gronds («Plateau grond» e «Rücken Caltgeras») èn las probabladads las pli pitschnas.
