Brinzauls - Turnar a chasa, preparar ils prads – però be temporarmain

I saja adina puspè in return spezial, raquinta Giorgin Bonifazi. El e sia famiglia èn stads ils emprims ch'han l'emna passada puspè pudì entrar en la vischnanca bandunada da Brinzauls. Quai per cultivar durant il di ils prads. Acceptar la situaziun saja anc adina grev. Era perquai ch'ins na sappia betg anc defintiv, co e nua enavant. E da passar tras la vischnanca bandunada saja stà fitg grev.

Ed era sche la lavur sin la prada fetschia bain a l'olma, turmentia la malsegirtad da viver en la fasa d'evacuaziun tuttina. Schliaziuns sajan bain sin maisa – definitv na saja dentant anc nagut.

Schliaziun a lunga vista en lavur sin l'atun – tut va pli ditg

Batist Spinatsch dal Plantahof è en contact cun divers uffizis per chattar ina schliaziun a lunga vista. Quella ins spera da pudair preschentar l'atun che vegn. La finamira saja da garantir la cuntinuitad als dus menaschis. Battist Spinatsch di ch'i saja il mument la pli gronda sfida da chattar terren per ils purs.

Ils plans dals dus purs da Brinzauls da midar bain e dachasa daventan bain pli concrets però dettia anc adina grondas sfidas. La finamira concreta dals uffizis saja è da construir da nov ils dus bains purils ordaifer la zona da privel. Ils purs duain però vinavant cultivar lur terren. Ils custs da questa midada surpigliass la Confederaziun per 90%. Envers RTR ha la famiglia Bonifazi ditg ch'els sajan entant pronts cun il chau per ina tala midada, ma betg anc cun il cor. Ed er sch'els ston la finala propi bandunar Brinzauls sco lieu da viver, saja per els essenzial da vinavant pudair cultivar lur terren che sa chatta en la zona cotschna. Uschia sco las generaziuns precedentas hajan era gia adina fatg.

Duas evacuaziuns – ed anc adina betg segir