Brinzauls - Ina vischnanca en moviment

Tut sia vita ha el passentà a Brinzauls. Rico Liesch sa regorda anc bain dal temp da scolar e che la costa davos la chasa da scola era anc avant 50 onns verda. Ussa èn las plantas davent, la crappa permanent en moviment ed adina puspè vegnan singuls craps enfin curt avant las chasas. Il pli grond respect ha l'anteriur pur e president communal dentant dal «Rutsch» da la costa che sa muventa cun in meter e 60 l'onn engiu. «Quai fatschenta», ma las emoziuns na mussa el betg e spera che manar davent l'aua porta puspè quietezza.