Senza resguard sin il concept da protecziun haja la vischnanca ed il chantun agì, resumescha Anita Mazzetta dal WWF Grischun ils plans per dapli pistas per skis cun rodas per l'arena da biatlon a Lantsch. Las organisaziuns per l'ambient WWF e Pro Natura hajan da l'entschatta davent infurmà e fatg attent a la problematica. Uschia manca per exempel ina expertisa davart ils cots e las giaglinas selvadias en la regiun ed er la dumonda da runcada na saja betg tematisada. Senza quella lubientscha n'avess la regenza betg dastgà lubir il plan d'utilisaziun per quest project. Vitiers fa il WWF attent ch'i dess senz'auter variantas che schanegiassan la cuntrada.
La dretgira decida
Il president communal da Lantsch, Simon Willi, è surstà dal recurs. Las organisaziuns per l'ambient sajan stadas involvidas da l'entschatta davent en il process.
La vischnanca ed il chantun han fatg ina tactica da salami.
Ins saja stà infurmà a scrit da bell'entschatta che las organisaziuns per l'ambient na sustegnan betg il project planisà en questa furma. I na saja mai vegnì entrà en las propostas fatgas e mai vegnì preschentà alternativas, crititgescha Mazzetta.
Alternativas
Las organisaziuns per l'ambient na sajan betg da princip cunter dapli pistas per skis cun rodas. Ina varianta savess esser in'autra lingia ni nizzegiar vias existentas. Per Anita Mazzetta è dentant er cler: «L'arena da biatlon è in implant da trenament per sportists da professiun e betg in lieu per sport da massa.»
