Alvra na fa betg pli part - Nov num per organisaziun turistica Surses

Quella è daventada necessaria, perquai che la vischnanca d'Albula/Alvra ha desditg avant circa dus onns il contract cun l’organisaziun turistica en il Surses. Il mument saja la vischnanca d'Albula/Alvra vi da ponderar, co ch’ella pudess s’organisar en l’avegnir turisticamain, ha ditg Daniel Albertin, il president communal. Pervi da mancanza da resursas hajan ins fin oz dentant betg anc cumenzà ad elavurar ina lescha da turissem. Ina da las sfidas saja da decider cun tgi ch’ins veglia collavurar, ha ditg Albertin.

En il Grischun Central datti trais organisaziun turisticas pli grondas: Quai èn la Tourismus Savognin Bivio Albula AG, la Lenzerheide Support und Marketing AG, e la Bergün Filisur Tourismus AG. A Stierva datti anc ina pitschna uniun turistica, ch’è dentant plitost ina uniun che fa pitschnas lavurs ed occurrenzas a favur dal turissem.