L'Alp Sut sur Pignia al pe dal piz Curvér è gia passa 100 onns betg pli en funcziun. Questa fin d'emna han ins dentant laschà reviver l'alp emblidada cun ina festa.
Da vesair na datti betg pli bler da l'Alp Sut sur Bavugls, l'acla da Pignia. Sulettamain in pèr mirs regordan anc a l'anteriura alp. Avant 500 onns, ils 4 schaner 1524 han ils purs da Pignia pudì cumprar l'Alp Sut ch'è stada en funcziun fin il 1900. Lura han ils purs da Pignia pudì cumprar l'alp Neaza ed han dà si l'Alp Sut, e fatg midada anc pli ad aut. L'alp Neaza era en possess d'industrials da Basilea. In di ch'ina vaiva da quels industrials saja stada sin l'alp Neaza da trid'aura e tschajera ed haja ditg ch'i na saja betg bel qua, uschia ch'ella ha vendì l'alp als purs da Pignia.
L'uniun Alp Sut
Exact 500 onns suenter ch'ils purs da Pignia han pudì cumprar l'Alp Sut han Mattia Mani, Andrea Cantieni, e Stefan Catrina da Pignia fundà l'Uniun Alp Sut. Quai ord differents motivs. Tras in schabetg è Mattia Mani vegnì en possess dad ina veglia tegia d'alp, l'uschenumnada «Tegia da Polenta» cun la cundiziun, da far insatge bel ordlonder. Andrea Cantieni ha interess da mantegnair las restanzas da l'Alp Sut per generaziuns futuras. Stefan Catrina che ha medemamain interess per mantegnair l'istorgia da sia patria è il terz suprastant da l'uniun Alp Sut che ha actualmain circa 40 commembers e commembras. La finamira da l'uniun è da mantegnair las restanzas da l'Alp Sut sco perditga istorica.
La Tegia da Polenta
Avrir la boxSerrar la box
Durant ils ultims tschientaners è quella tegia stada pustada sin ina spunda vers il nord dal uschenumnà «Wasserboden» da l'alp Lambegn. Il 1975 aveva il Museum naziunal svizzer cumprà il bajetg da la societad d'alp, demontà la tegia e transportà ella a Turitg. Durant 20 onns è ella vegnida admirada sco part dad in concept da bajetgs. Tras lavurs da sanaziun dal cumplex dal museum è er il concept da l'exposiziun vegnì midà uschia che la Tegia da Polenta n'aveva nagin plaz pli. Curt avant ch'ella è vegnida dischlocada ad in auter lieu è la Cuminanza Culturala Val Schons vegnida attenta sin quels plans ed ha intervegnì. Dapi il 1998 è la Tegia da Polenta puspè en sia patria. In temp era ella installada en la zona d'industria a Ziràn, là ha ella dentant betg survegnì grond'attenziun. Tras in schabetg è Mattia Mani vegnì en possess da quella tegia. Actualmain è ella plazzada tranter ils mirs da l'anteriura Alp Sut sco perditga istorica. Sch'ella po restar là è dentant intschert. Perquai ha l'Uniun Alp Sut lantschà ina petiziun per la Tegia da Polenta. Il futur è dentant anc intschert.
Festa per l'alp emblidada
1 / 12
Legenda:
L'Alp Sut vegn reactivada
Stefan Catrina da l'uniun Alp Sut reactivescha l'alp cun snizzar ina magnucca chaschiel d'alp.
RTR
2 / 12
Legenda:
Uniun Alp Sut
Stefan Catrina, Mattia Mani e Andrea Cantieni, la suprastanza da l'Uniun alp Sut ed il comité d'organisaziun per la festa avant la Tegia da Polenta
RTR
3 / 12
Legenda:
Passa 100 persunas han chattà la via sin l'Alp Sut al pe dal Piz Curvér.
RTr
4 / 12
Legenda:
Suns da Cornamusa resunan sin l'Alp emblidada.
RTR
5 / 12
Legenda:
Suns da tiba tranter las restanzas dals bajetgs da l'Alp Sut.
RTR
6 / 12
Legenda:
Musica populara durant la festa.
RTR
7 / 12
Legenda:
Products da l'alp Neaza per giudair.
RTR
8 / 12
Legenda:
Pulenta cuschinada sin in fieu per onur da la Tegia da Polenta.
RTR
9 / 12
Legenda:
Plaz da festa sin l'Alp Sut.
RTR
10 / 12
Legenda:
Reto Crameri durant ses pled da festa.
RTR
11 / 12
Legenda:
Andrea Cantieni prelegia la brev da la Tegia da Polenta che dovra sustegn.
RTR
12 / 12
Legenda:
La tegia ha in'istorgia muventada.
RTR
Festa 500 onns Alp Sut
Uschè bleras persunas en ina giada èn probabel anc mai stadas sin l'Alp Sut, sur l'acla Bavugls al pe dal Piz Curvér. Passa 100 persunas han la sonda passada chattà la via per far festa per «l'Alp emblidada». Sco act simbolic per reactivar l'anteriura Alp è vegnì snizzà in chaschiel d'alp. Per onur da la Tegia da Polenta han ils visitaders e las visitadras pudì giudair pulenta cuschinada sin il fieu. Tuns da tibas, musica populara e suns da cornamusa han enramà la festa.
