Il viadi cumenza la sonda en damaun en la «Fontauna Gamella» a Flerden – la suletta butia da la Mantogna. Dapi var 25 onns datti en la veglia scola da Flerden questa purschida. Sper ina butia cun il pli impurtant per il mintgadi datti er in pitschen restaurant – u plitost in café.
Mo in restaurant sin tut la Mantogna: Cler che quai haja in'influenza, manegia Amina Horber. La studenta lavura en la Fontauna Gamella. Sch'ella vul dentant sa scuntrar cun collegas, spetga adina sco emprim in viadi da 20 minutas fin giu Tusaun – u schizunt fin a Cuira.
En direcziun Glaspass
Da Flerden va l'auto da posta vers ensi, en direcziun Glaspass. Cun ir si da la via pon ins vesair, ch'i dat anc in u l'auter bain puril sin la spunda.
Arrivà sisum il Glaspass è la plazza da parcar gia plaina. Surtut turistas e turists nizzegian questa sonda la pussaivladad da far in viadi dal di.
Fertant che l'auto da posta passa puspè giu vers la val, vegni pli quiet. Quella quietezza saja la finala er ina part da Mantogna, dian differentas persunas da Flerden fin sin il Glaspass.
Tge ha il «Lai da las strias» propi da far cun strias? U savevas ch'i dat en la Val di Campo in lai ch'exista be la primavaira e nua ch'i vegn schizunt sfunsà? Tals lieus spezials ma pli pauc enconuschents datti blers en il Grischun.
RTR scuvra intgins questa stad. Qua datti la survista da tut las istorgias.