Suenter sis onns a la testa da la FMR surdat Corina Casanova il presidi da la fundaziun en novs mauns. Durant ses temp d’uffizi, ils emprims sis onns d’existenza da la FMR, saja ella s’engaschada per installar, constituir e consolidar cun success la nova fundaziun sco instituziun indispensabla per las medias rumantschas scrittas. Il cussegl da fundaziun engrazia a Corina Casanova per sia gronda lavur, ses impegn e sia premura tant sco era per la preziusa collavuraziun durant tut quests onns. Durant quests sis onns hjaa ella era sustegnì l’instituziun dad iniziar ed elavurar strategias a lunga vista en connex cun la transfurmaziun digitala.
Corina Casanova en l'archiv da RTR
Medemamain engrazia il cussegl da fundaziun a Carl Hassler per sia valurusa lavur en il gremi suprem da la FMR. Era Carl Hassler saja stà commember dal cussegl da fundaziun dapi l’onn 2019 ed el saja s’engaschà fermamain surtut er cun sia expertisa en fatgs e dumondas da persunal, da finanzas e d’assicuranzas, scriva la FMR.
Jon Pult a la testa a partir da l'avril
Sco nov president da la FMR a partir dal prim d’avrigl 2025 è vegnì elegì il cusseglier naziunal Jon Pult. Jon Pult è creschì si a Cuira e viva actualmain a Cuira ed a Berna. Cun Jon Pult surpiglia il presidi da la FMR ina persuna rumantscha che sa mova dapi blers onns en il mund da la politica, da la communicaziun e da las medias. Sco cussegliader da strategia e communicaziun ed era sco commember da la cumissiun per traffic e telecommunicaziun dal Cussegl naziunal enconuscha Jon Pult las tematicas ed era las sfidas en connex cun la diversitad mediala.
- abita a Cuira
- naschì 1984
- maridà
- cussegliader da strategia e communicaziun
- deputà dal Cussegl grond 2010-2018
- dapi 2019 cusseglier naziunal
- president da la cumissiun per traffic e telecommunicaziun
La FMR garantescha ensemen cun RTR di per di in schurnalissem en lingua rumantscha. Quai è fundamental per l’avegnir da nossa lingua e cultura, ma era per la democrazia en nossas regiuns. Gist en noss mund plain malsegirtads e dischinfurmaziun èsi fitg impurtant da garantir di per di in schurnalissem da qualitad rumantsch. Jau m’allegrel da m’engaschar persuenter sco president da la FMR.
Kevin Brunold nov commember dal cussegl da fundaziun
En la sesida dals 7 da mars 2025 è era vegnì elegì Kevin Brunold da Surcuolm sco nov commember dal cussegl da fundaziun. Il directur da Surselva Turissem s’engascha dapi onns era politicamain sco deputà en il Cussegl grond.
- è il co-president dal Center Grischun
- è deputà dal Cussegl grond
- è il CEO da la Surselva Turissem SA
- naschì dal 1985
- abita a Surcuolm