Per far in viadi enturn il mund dovri normalmain ina detga organisaziun. Visas, guids per pajais ester. Alura ston ins avair in detg daner da la vart ed er temp. La sort viadi dal mund ch'è vegnì purschì sonda, ils 16 da settember 2023, a Passugg è stà in toc pli favuraivel e cuntanschibel cun far radund 10 stortas cun l'auto da posta da Cuira si vers Passugg. Là han ins pudì trametter la lieunga ed il magun ina giada enturn il mund – quai en il rom dal Food Festival.
Sin la gronda terrassa sulegliva da la scola da turissem ed ospitalitad èn bajegiads si stans nua ch'ins ha pudì degustar spaisas tipicas da differentas parts dal mund. Spezialitads da l'Italia sur la Tailanda enfin al Mexico ed enavos en il Grischun. Per quellas e quels che han gugent charn era pront in grond gril. In auter stan era spezialisà sin spaisas vegetarianas.
Ed er amaturas ed amaturs da dultscharias n'èn betg vegnids a la curta. Gist davos la halla d'entrada dal hotel, en ina grond sala cun paraids da lain stgir e tarpun cotschen han ils profis da patissaria numnadamain bajegià si in imposant buffet da desserts.
Las spaisas èn vegnidas servidas sin vaschella or da feglia da palma. E las purziuns eran pitschnas, perfetg per propi pruvar in pau da tut e per tuttina survegnir detg avunda.
Il giuven bab, Chasper Kindschi, è qua cun sia dunna e lur uffantin dorma stain e bain en la charrotscha. E na sa lascha betg disturbar dal travagl u da la musica da la band che chanta e suna covers da chanzuns enconuschentas. La famiglia che stat a Cuira ha gia vulì vegnir l'onn passà al Food Festival. Insatge era dentant vegnì tranter en. Uss èsi gartegià. Ed i ha sa rendì – il mangiar gusta e l'occurrenza plascha.
Tranter las visitadras ed ils visitaders èn surtut glieud dal conturn, ma er bleras anteriuras studentas ed anteriurs students. Sco Diego Colombarolli che ha terminà sia scolaziun a Passugg l'onn 2014 e lavura ussa giu Turitg. El haja er emprendì enconuscher sia dunna qua, ch'era era studenta da lezzas uras. Uss sajan els maridads dapi in onn ed hajan pensà ch'i fiss bel da puspè ina giada vegnir sin visita en lur scola veglia nua che lur istorgia d'amur ha cumenzà avant var 10 onns.
Tge che fa unica la festa che celebrescha il da mangiar e l'ospitalitad è che las persunas che van qua a scola e lur persunas d'instrucziun stattan en il center. Quai raquinta Simon Rindlisbacher che fa part da la direcziun da la scola a Passugg. L'um oriund da Son Gagl è responsabel per l'entira organisaziun da l'eveniment.
Las persunas che lavuran al Food Festival èn las studentas ed ils students da l'emprim semester da la scola spezialisada superiura. Ellas ed els derivan da 30 differentas naziuns e da la Svizra. Quai dettia in mix stupent. Ins lavura en cuschina, en il service sco er tut l'auter che tutga vitiers sco preparar e far urden la fin.
Igl è bel che la glieud giuvna metta en pais l'event.
Ina da quellas studentas ch'era dapi las 07:30 sin las chommas è Lea Schmid da Rapperswil Jona. Ella era partida en tar il post mexican. Sper il vestgì e la chapitscha da cuschiniera porta ella si dies in «sombrero» che dat la dretga tempra. Ad ella plaschia da pudair far experientschas ad in tal event. I saja insatge tut spezial.
La glieud che vegn è «lässiga» ed igl è mega cool che nus savain metter enturn qua quai che nus emprendain en la scola da hotellaria. Alura ves'ins tge ch'ins ha emprendì e tge ch'ins sa. I gida fitg. Jau ma sent bler pli segira.
E sch'As dumandais tge che capita suenter l'occurrenza cun las spaisas che restan enavos: Quellas èn vegnidas da bun la saira a las radund 250 studentas e students ch'èn da chasa en l'internat da la scola a Passugg.
