La Scol'auta spezialisada dal Grischun, FHGR, survegn in nov institut. L'anteriur center «Data Analysis, Visualization, and Simulation», curt «Davis», vegnia transfurmà en in institut cun quatter incumbensas da prestaziun, numnadamain: scolaziun, perfecziun, perscrutaziun e servetschs. Quai ha communitgà la FHGR. En tut datti uschia otg instituts a la Scola auta spezialisada dal Grischun.
Manader dal nov institut è Heiko Rölke. El ha gia manà il center Davis dapi la fundaziun da quel avant tschintg onns.
Center stgaffì sin incumbensa da la regenza
Il 2018 ha la regenza grischuna dà l'incumbensa da stgaffir e da manar il center Davis ed al ha dotà supplementarmain cun ina professura speziala. La finamira era da porscher servetschs interdisciplinars per l'economia regiunala, l'industria ed il turissem. Il center dueva era oravant tut promover la digitalisaziun en il Grischun.
Ch'ins haja pudì transfurmar il center en in institut independent, mussia ch'il Davis haja ademplì sia incumbensa e ch'el possia avanzar la digitalisaziun er en l'avegnir, di Heiko Rölke. Da nov dettia era ina purschida en il rom da l'intelligenza artifiziala. Il num «Davis» munta uss: «Data Analysis, Artificial Intelligence, Visualization, and Simulation».
