Plantas e chaglias taglian ins il meglier enavos avant che la naiv vegn. Qua vala tenor Gianna Candinas, che lavura sco ortulana da la cuntrada tar la fatschenta Garten und Sportanlagen a Glion, la devisa: «Pli pauc è pli bler» – pia betg tagliar memia bler.
Betg tagliar memia bler e laschar las plantas natiralas, quai è il meglier.
Pumera taglian ins pir enavos cura che las plantas han nagina feglia pli. Uschia han ellas pudì trair enavos tut quai ch'ellas dovran en las ragischs e na survegnan naginas malsognas. Plantas pli sensiblas pon ins pachetar en cun l'uschenumnà «Jutaband», chagliom pon ins liar cun ina corda per che la naiv na fetschia nagins donns. E la primavaira pon ins lura tagliar liber tut ed i vesa or andant.
Metter flurs en tschaler
Per ch'ils geranis flureschian puspè onn che vegn: tagliar enavos els. Ed era flurs da tschagula pon ins tagliar enavos u sa laschar trair enavos. Lura magasinar las fluras en in tschaler stgir cun ina temperatura da circa otg grads. Betg dar memia bler aua.
Tgi ch'ha in pastget duess prender ensemen la figlia e cumpostar quella. L'enviern pudess il pastget numnadamain smarschir sut la figlia. Ed i vesia natiralmain er opticamain ora meglier.
Tgi che vul far insatge bun per la natira po laschar la figlia en curtin, quai è in bun lieu per animals per sa retrair l'enviern.
