La citad veglia da Cuira n'è betg mo ina citad veglia durant las proximas sis emnas, mabain er il lieu per l'exposiziun d'art «La Cultura». Roman Benker e Marco Looser, ils fundaturs da l'uniun «Citad Veglia Cuira», han organisà quai. Cun in inserat en la gasetta han els chattà passa 40 persunas interessadas. L'intenzun principala è natiralmain da far recloma en il senn il pli vast, uschia ils organisaturs.
Roman Benker descriva «La Cultura» sco ina exposiziun d'art en butias. 20 butias en la citad veglia han pudì tscherner mintgamai in artist u ina artista. Las butias èn numeradas, ed i dat ina carta per ch'ins chatta er propi tut las butias cun ovras d'art.
Nus spetgain discurs ed inscunters fitg interessants.
En la butia «Killias Tischkultur» ha Martha Bandli per exempel pudì exponer sia art. Ed era per Elena Könz è quai ina gronda onur, da savair presentar ses art en la butia «Go Vertical».
