«Discurrin sur da rassissem en il Grischun», uschia fan placats en la chapitala grischuna actualmain attent sin l’exposiziun «Nus ed ils auters – dal pregiudizi al rassissem». Quella ha actualmain lieu en la galaria da la citad a Cuira. Organisà vegn ella dal Post spezialisà per l'integraziun dal chantun Grischun.
Ma tge è rassissem insumma? Donat Albin dal Post spezialisà per l'integraziun declera ch’i dettia differentas definiziuns. Ins possia dir che cura ch’ins categorisescha persunas e dettia ad ina gruppa dapli valur che a l’autra discurrian ins da rassissem.
Rassissem è sch’ins fa giu ina persuna pervi d’ina caracteristica, sco per exempel la colur da la pel u sch’igl è grev da chattar in'abitaziun per ina persuna d’ina tscherta religiun u pervi d’autras caracteristicas.
Per Donat Albin èsi il pli impurtant per far insatge encunter rassissem da discurrer surlonder.
La finamira da l’exposiziun è da vegnir en il discurs cun la glieud per reflectar sasez, ils maletgs che nus avain en il chau ed ils noss pregiudizis.
Per vegnir en discurs cun la glieud saja mintgamai sin il lieu ina persuna dal fatg dal Post spezialisà per l'integraziun che dettia pled e fatg.
L’exposiziun a Cuira sa drizza tant a creschids sco er a scolaras e scolars da scolas superiuras, scolas medias e scolas professiunalas. Ina da las scolas che ha nizzegià questa purschida è la scola superiura da Favugn. A la glieud giuvna para l’exposiziun d’avair fatg impressiun.
Jau prend cun mai da betg insultar insatgi.
Jau prend cun mai da guardar tge ch’ins di, er sch’ins na manegia insatge betg uschia.
Per la scolasta da religiun ed etica, Gabi Jakob èsi stà cler ch’ella vuless visitar l’exposiziun cun las scolaras ed ils scolars. Pregiudizis e co ir enturn cun noss concarstgaun sajan adina puspè temas che vegnian approfundads. I saja in tema fitg impurtant per ella. Perquai che Favugn saja uschè damanaivel da Cuira haja ella decidì da vegnir e visitar cun las scolaras ed ils scolars l’exposiziun. Er sch’els n'hajan gist suenter las vacanzas betg gì bler temp da sa preparar. Ma quai fetschian els proximamain sco reflexiun.
Jau hai emprendì ch’igl ha dà en il passà exposiziuns nua ch’igl èn vegnidas messas ora persunas d’auters pajais sco en in zoo u circus. E jau hai er emprendì che persunas d’auters pajais pon avair pli grev da chattar tar nus ina lavur.
Jau chat crass quant gronda che la separaziun da las razzas è stada.
L’exposiziun ambulanta pon ins anc visitar enfin ils 6 da matg en la gallaria da la citad a Cuira. Silsuenter po ella vegnir cudeschada da scolas grischunas per tractar il tema «rassissem» cun scolaras e scolars avant lieu.
