En il museum da la natira dal Grischun datti ina nova exposiziun: «evolution happens!». Il tema è l'evoluziun ozendi. Nua datti ella? Nua pon ins vesair ella?
Flurin Camenisch, zoolog e pedagog dal museum, descriva l'idea da l'exposiziun sco emprova, per render pli enconuschent a la glieud quest tema.
Questa exposiziun vul mussar tge evoluziuns ch'i dat ussa tar nus.
L'evoluziun vegn declerada a maun da differents animals, per exempel mieurs ed utschels. Ils animals survivan pervia da l'evoluziun – ma per nus umans n'è ella betg adina positiva, declera il zoolog. Tar las bacterias capita l'evoluziun uschè svelt, che l'antibiotica n'ha betg pli success suenter paucs onns.
In animal che n'ha era betg pudì profitar da l'evoluziun è il capricorn. Cur ch'ils animals èn bunamain vegnids extirpads avant 100 onns, han ils Svizzers empruvà da restabilir ils capricorns. pervia da la pitschna diversitad dals gens hai dà blers defects genetics, ch'èn anc visibels en il temp dad oz.
Per Flurin Camenisch saja impurtant da mussar a la glieud, che l'evoluziun è pli damanaivel a noss mintgadi che quai ch'ins pensa.
