La plazza da scola a Zuoz è vegnida sanada e gulivada dapi il matg da quest onn. Suenter che la radunanza communala aveva ditg gea il 2022 al project, ha la suprastanza anc dumandà per in ulteriur credit per sanar era l’infrastructura sutterrana e per installar tualettas publicas. En tut lavurs per 1,7 milliuns francs.
Nagina pendenza pli
Il midament e la gulivaziun da la plazza da scola a Zuoz aveva fatschendà la vischnanca durant plirs decennis. Singuls projects preschentads, n’eran betg vegnids approvads da la populaziun. Per exempel ina varianta pronta dal 2011. Uss è la plazza betg pli torta e vegn circumdada d’in mir da betun grugl che porscha plazza per seser.
Cumbinà plirs projects en ina
Sper l’adattar la plazza èn era vegnidas installadas tualettas publicas cun access per persunas cun impediments. Empè da las duas stgalas che mainan en la sala da gimnastica e la chasa da scola, è vegnì furmà ina sort palc a l’entrada da las duas chasas. Quel duai esser la basa per occurenzas multifarias en il center dal vitg. Ultra da quai è era vegnì installà in attatg per in stgaudament a distanza.
La populaziun da Zuoz ha pia pudì festivar l’emprima dumengia d’advent l’emprima giada sin ina plazza guliva. L’inscunter ha imbellì il chant dal chor viril Guardaval sin il nov podest.
Durant il temp da construcziun han ils scolars e las scolaras da la primara passentà lur pausas sin il parcadi Plagnoula.