La chasa da scola primara a Zuoz vegn plaunet en las stretgas areguard localitads. La vischnanca ha perquai instradà ina concurrenza d’architectura per sviluppar in nov bajetg, paucs meters davent da la scola existenta, en il quartier Plagnoula.
Trais chasas da scola vi da la medema via
Entant ch’ils uffants dal stgalim 2, pia scolaras e scolars da la terza enfin sisavla classa restassan en la scola existenta – duai il nov bajetg planisà dar dimora al stgalim 1 da la scola. A quel fan part la scolina, ed ils uffants da l'emprima e segunda classa. Ultra da quai èn er previsas localitads per la structura da di, per la maisa da mezdi e per la gruppa da gieu sut il medem tetg. La scola secundara e reala è dapi plirs onns da chasa en localitads dal Lyceum Alpinum.
Flexibilitad è stada decisiva
Or da las 66 propostas da la concurrenza è la giuria sa decidida suenter pliras rundas da selecziun, per la proposta da project «Après-Ski» d’ina cuminanza d’architects a Turitg. La proposta victura che vegn remunerada cun in premi da 26’000 francs, prevesa da realisar in stabiliment sin quatter auzadas.
Il project saja stà il pli persistent da las propostas inoltradas ed areguard la funcziunalitad il pli optimal, manegia il president communal da Zuoz, Romeo Cusini.
Il grond avantatg da quest project è, ch’el resta flexibel areguard la structura. Grazia a quella sa laschan las stanzas adattar a differentas grondezzas.
La vischnanca quinta cun in’investiziun da radund 9 milliuns francs per il project. En in proxim pass vegn il project da basa concretisà ed adattà als basegns actuals. Silsuenter vegn quel preschentà a la populaziun da Zuoz, sche pussibel en la radunanza communala il favrer 2025. Tenor calculaziuns optimalas da temp, pudess ins far quint cun la nova chasa da scola il pli baud per l'onn 2030.
