Zuoz è ina da las unicas vischnancas, nua che las mattas da scola n’han nagina incumbensa al Chalandamarz. Quai duai sa midar en avegnir. Numnadamain ha la suprastanza communala elavurà ensemen cun la cumissiun da Chalandamarz in nov urden. Il motiv è che l’actual na correspunda betg pli a las leschas superiuras d’egualitad, sco Andrea GIlli, il president communal da Zuoz ha ditg a la radunanza communala.
Medems dretgs per tuts
Il nov urden prevesa d’integrar cumplainamain er las mattas en il Chalandamarz. Vul dir, ch’er ellas sa duessan vestgir sco ils mats cun ina blusa blaua, chapitscha cotschna ed ina plumpa u brunsina. In fatg, che ha chaschunà ina discussiun animada a la radunanza communala cun 62 persunas preschentas. Vuschs criticas teman in privel per la tradiziun, sche quella vegniss rutta.
Urden vegn anc ina giada surlavurà
Auter che previs, n’ha la radunanza communala betg decis per u cunter las midadas. La tractanda è vegnida retratga, l’urden vegnia surlavurà e suttamess a la proxima radunanza communala da l’avust. Tenor Andrea Gilli èsi impurtant da mantegnair l’usit da Chalandamarz, dentant giaja quai be, sch’i dat in svilup.
Ord l'archiv:
Quest onn han er las mattas da Gurada pudì ir l'emprima giada al Chalandamarz. Gia dapi intgins onns portan las mattas a Samedan la chapitscha cotschna e la blusa blaua.