A Zernez duai tuttina dar tests da corona en scola. Quai pretenda ina gruppaziun da geniturs ed convischins da Zernez. 105 geniturs ed ulteriurs 115 abitantas ed abitants han suttascrit ina charta averta. Cun quella vulan els far squitsch sin il cussegl da scola.
Quel aveva decis avant duas emnas da betg introducir tests da corona facultativs en scola. L'argumentaziun era, ch'ils tests dad uffants sauns na fetschian nagin segn e che quellas acziuns prendan davent temp da scola.
Ils geniturs hajan communitgà il resultat al cussegl da scola – ensemen cun la pretaisa da reponderar la decisiun da betg testar. Plinavant veglian els infurmar la populaziun davart la situaziun actuala.
Cussegl da scola na prenda anc betg posiziun
Il cussegl da scola na prenda anc betg posiziun davart las 220 suttascripziuns. Il president dal cussegl, Beat Schärer, ha dentant ditg envers RTR, ch'il cussegl prevesa da seser ensemen l'emna proxima.