La politica è stada sia gronda passiun. El ha entschet l'onn 1985 sco vicepresident, l'onn 2007 è Victor Peer daventà president communal da Ramosch e suenter la fusiun, president da la vischnanca da Valsot.
Jau hai adina gì gust sche giuvens fan politica. Cun 65 onns èsi temp da chalar.
Projects impurtants sut sia batgetta èn stads la fusiun da Tschlin e Ramosch a la vischnanca da Valsot, la realisaziun d'ina zona da mastergn ch'ha attratg bleras firmas, la construcziun d'ina butia a Ramosch, la planisaziun locala ed auter pli. Finanzialmain stat la vischnanca oz sin bunas chommas.
Sch'in president è adina bainvis, lura n'ha el betg fatg ses duair.
El haja adina communitgà a moda clera e transparenta, di Peer. Quai saja sia tenuta è quai saja era stà ses recept da success, ma i dovria era buns amis che sustegnian durant tut ils onns en uffizi.
Ussa suenter 40 onns politica communala chala Victor Peer per la fin da l'onn 2024 e di definitivamain a revair a la politica.