Peder Caviezel sentiva durant sia candidatura sco «Capo» ina tscherta sceptica tar il persunal. Ma quai haja sa quetà suenter in pèr dis. El haja cloma ensemen il persunal da l’administraziun e gì buns discurs. Uss, suenter var 100 dis en uffizi, haja el s'acclimatisà bain.
Gia avant l’elecziun in december aveva il nov president communal communitgà da vulair avrir las portas dal biro per pussibilitar a la populaziun da vegnir a discutar cun il president communal. Quai haja funcziunà fitg bain, manegia Caviezel. Ademplir e realisar ils giavischs è lura in’autra istorgia.
Cura che jau bandun il biro, bandun jau era ils affars politics
Peder Caviezel lavura parzialmain sco manader dal manaschi tar l’Uffizi da construcziun bassa a Scuol. El va il fanadur 2025 en pensiun e dastga a partir da là sa concentrar plainamain sin la vischnanca da Valsot.
Peder Caviezel è gia stà en il cussegl communal da Ramosch, plinavant era el president da la partida burgais-democratica, oz «Il Center». Durant 12 onns ha el manà il corp da pumpiers da la vischnanca. Ina da las grondas passiuns dal nov president communal è la chatscha.
Buna basa finanziala, ma sfidas cun spazi d'abitar
La vischnanca sta bain da finanzas, ma i dettia anc blers projects pendents, uschè il nov president communal. 95% da la taglia d’impostas chantunala: quai resta dentant era en avegnir uschia. Il spazi d’abitar è ina da las grondas finamiras da Peder Caviezel, che lavura anc parzialmain tar l’uffizi da construcziun bassa.
I na dastga bain betg esser che famiglias giuvnas na chattan nagin’abitaziun. Quels èn noss avegnir.
Adattà al tema
Gia il 2022, en connex cun l’elavuraziun da la planisaziun communala, vuleva la vischnanca da Valsot promover la fabrica d’abitaziuns per indigens, numnadamain emprimas abitaziuns.
