Vipra aspida en Val Müstair - Vipras datti dapertut – ma betg la vipra aspida

Las vipras aman il sulegl, vivan tranter crappa e mirs setgs ed èn da tissi. Ma la vipra aspida pon ins observar fin en in'autezza da 1'600 meters sur mar, la vipra normala percunter viva era bler pli aut sin las muntognas, di Valentin Pitsch. El è anteriur magister ed amatur da «las vermas», sco quellas vegnan numnadas en Val Müstair.

El enconuscha ils lieus. En Val Müstair vivan las vipras plitost sin la spunda sulegliva e la populaziun è tenor Valentin Pitsch intacta. Il pli facil d’observar ellas èsi la primavaira, cur che la vegetaziun è bassa e las temperaturas anc miaivlas.

Per Valentin Pitsch è quai in hobi d'observar, documentar e chattar novs lieus nua che las serps vivan en Val Müstair. Perquai collavura el era ensemen cun «Infofauna», il post da coordinaziun per amfibis e reptils da la Svizra.