Las sendas da viandar en la regiun dal Piz Scerscen n'èn betg periclitadas da bovas posteriuras. Quai demussan duas expertisas geologicas che la vischnanca da Samedan e l'Uffizi chantunal per guaud e privels da la natira han laschà far suenter la bova dals 14 d'avrigl. Decisiv per la periclitaziun actuala en la Val Roseg saja sch'aua mitschia dal sediment da la bova.
La bova consista actualmain d'ina maschaida da crappa e glatsch. En questa situaziun sa dat il privel cura che quest glatsch luenta. Uschia vegn cusseglià da betg metter pe sin il cugn da la bova perquai che blocs e crappa pudessan sa distatgar e dar ensemen. Era resta la senda da viandar en la planira da la val en direcziun Lej da Vadret serrada.
La vischnanca cusseglia vinavant da betg passentar temp en la planira sut la bova. Quella pudess vegnir inundada andetgamain era da bell'aura. La gronda part da las sendas da viandar resta averta.
La bova è ida a val ils 14 d'avrigl
Tenor registraziuns dal Servetsch seismologic svizzer sto la bova da crappa esser sa distatgada en la Val Roseg la dumengia damaun. Sco che la pledadra da la Polizia chantunala, Anita Senti, ha confermà envers RTR sa tractia d’ina gronda bova che saja congualabla cun quella dal Piz Cengalo.
Igl è stà ina gronda fortuna ch'igl è capità la dumengia la damaun baud a las 07:00 cura che paucas persunas eran en viadi. Ed era che la loipa e la via d'ir a spass eran serradas.
La bova saja sa distatgada vi dal Piz Scerscen entadim la Val Roseg, di il president communal da Samedan Gian Peder Niggli. Il volumen da la bova vegn stimà sin passa in milliun meters cubics. Quai correspunda da la bova da Bondo l'onn 2017.
Il material da crappa, glatsch è naiv haja tratg fastizs sur ina lunghezza da var tschintg kilometers. La bova è sa fermada var 1,5 kilometers davant l’Hotel Roseg. Alpinists ch’eran en viadi per ir sin il Piz Bernina hajan annunzià la crudada da crappa.
